688Այս խոսքս հիշի՛ր, հիշի՛ր միալար,

1. Այս խոսքս հիշի՛ր, հիշի՛ր միալար,

Որ դու մեռնում ես ապրելու համար:

Հիշի՛ր` ով էիր դու այս աշխարհում,

Հիշի՛ր` հին մարդը քեզ ուր էր տանում:

Հիշի՛ր` խաչն էիր հանում Հիսուսին,

Մահվան սև լուծն էր դրված քո ուսին:

Որ փուչ մեկն էիր` քեզանով գերված,

Ավեր տուն էիր` հիմքդ խարխլված:

Դու ապրում էիր մեղքով միալար,

Եվ այս ամենը` մեռնելու համար:

2. Բայց եղավ մեկ օր, որ լույս ստացար,

Տիրոջից շնորհք ու հույս ստացար,

Լուսավորվելով` քեզ ճանաչեցիր,

Ապրածիդ համար խիստ ամաչեցիր:

Ատեցիր կյանքը` խղճուկ, վաղանցիկ,

Անոթդ սրբվեց, դարձավ թափանցիկ,

Ու Տերն երևաց այնտեղ Իր լույսով,

Քեզ մխիթարեց ու արեց հույսով,

Որ դու Իր ձեռքով կյանք պիտ ստանաս,

Եթե Իր խոսքի, սիրո մեջ մնաս:

3. Եվ Նա խոստացավ քեզ Իր մոտ տանել,

Հզոր բազուկով Իր գահին հանել:

Կտեսնես այնտեղ սուրբ եղբայրներին,

Կտեսնես այնտեղ հրեշտակներին,

Կտեսնես այնտեղ Տիրոջդ փառաց`

Սիրո կանթեղը Իր ձեռքում վառած:

Կտեսնես նաև Փրկչիդ վերքերը,

Որ պիտի պատմեն Հիսուսիդ սերը:

Եվ արժե մեռնել այդ սիրո համար,

Բայց մենք մեռնում ենք ապրելու համար: